नेताजी तपाई आफ्नो काम गर्नुस् पत्रकारलाई आफ्नो काम गर्न दिनुस्, भन्नु यति हो

लगभग १० वर्षदेखि मुलधारको पत्रकारीतमा मधेशका लागि मैले निरन्तर कलम चलाउँदै आइरहेको छु । जहिले पनि मधेशकै लागि लेखे विभिन्न साप्ताहिक, मासिक, पाक्षिक तथा दैनिक पत्रिकाहरुमा । सामाचारको मामलामा कसैसँग कहिले सम्झौता गरिन । तर, यस अवधिमा थुप्रै मधेशी नेताहरुलाई नजिकबाट चिन्ने मौका पाए । आफ्नो स्वार्थ पुरा हुने अवस्था छ भने जुनसुकै सुचना फोन गरेर वा घरमै बेलाएर दिन्थे । जहाँ आफ्ना अनुकुल छैन, त्यहाँ सुचना दिनु कहाँ हो कहाँ उल्टै आदर्शवादी कुरा सुनाएर पठाउँथे । यहाँ कसैको नाम उल्लेख गर्नु सान्दर्भिक ठानिन किनभने यो पनि पत्रकारीताको धर्मभित्र पर्छ । 

    म अहिले थुप्रै नेतालाई सम्झिन चाहन्छु जो मन्त्री बन्न नपाएको झोकमा आफ्नै पार्टीको भित्री कुराहरु दिएर सामाचार छाप्न लगाएका थिए । पार्टीको कुनै पद नदिँदा, पार्टीभित्र अवसर नदिँदालगायतको अवस्थामा बोलाई बोलाई सुचना दिने काम यिनी नेताहरुले गरेका छन् । यहाँसम्म कि यो लेख्नु यो नलेख्नु भनि निर्देशनात्मक शैलीमा दिन्थे । समाचार दिन्छु तर मेरो नाम आउनु हुँदैन पनि भन्थे । र, स्रोत पत्रकारको सबभन्दा ठुलो सम्पत्ति हो । र मैले लेख्ने समाचारमा आजसम्म कहिले पनि स्रोतलाई अप्ठ्यारो पार्ने काम गरिन् । आउने दिनमा गर्दिन पनि तर आज त्यही नेताहरु मेरो सामुने ठुलो बन्न चाहेका छन् ।

    आज यी कुराहरु किन लेख्दैछु भने केही दिनदेखि मधेशका केही नेताहरु मेरो समाचारलाई लिएर निकै आलोचनात्मक ढंगबाट टिप्पणीहरु गरिरहेका छन् । तीन दलको एकीकरण प्रकृयाको बारेमा मैले जसरी समाचार लेखे त्यो एउटा पत्रकारको धर्म पनि हो र त्यही धर्म मैले निर्वाह गरे । मैले लेखेको सामाचारले एकीकरण प्रकृया अवरुद्ध होला जस्तो मलाई लाग्दैन ।  म पनि मधेशमा एकीकरण होस् भनि चाहन्छु, र मेरो सकारात्मक सहयोग पनि छ । मधेशी तीन दलको बैठकमा कुन पार्टीबाट एकीकरणका लागि कस्तो धारणा आयो त्यो समाचारको रुपमा सम्प्रेशन गरे । गत शनिवार बसेको तीन दलको बैठकमा केन्द्रीय समिति कति सदस्यीय हुनुपर्छ र त्यसका लागि कुन दलले के कति प्रस्ताव गरे त्यति मात्र आफ्नो ब्लगमा के लेखेका थिए । नेताहरुको निन्द हराम भयो । बैठकमा अरु के के खिचरी पाक्छ, कसको बारेमा के टिक्का टिप्पणी गर्छ सबै सुचना मसँग सुरक्षित छ यदि सबै हुबहु राख्यो भने के हालत हुन्छ ती नेताहरुको । केन्द्रीय समिति कति सदस्यको हुनुपर्छ भनि फोरम नेपालले गरेको प्रस्ताव, तमलोपा र सद्भावनाले गरेको प्रस्ताव बाहिर ल्याई दिए त के गल्ति गरे । यो सुचना त समान्य सुचना हो जस्तो लाग्छ तर त्यति पनि पचेन उनीहरुलाई र टिक्का टिप्पणी गर्न थाले । यहाँ क्लिक गर्नुस् मधेशमा हुन लागेको एकीकरण पार्टीमा कति सदस्य राख्ने जान्नलाई त यो पढ्नैपर्छ

    आज (सोमवार) पनि बैठक थियो । आजको बैठकमा एकीकृत पार्टीको अवधारणापत्रको बारेमा छलफल भयो । त्यहाँ स्वायत्त मधेश प्रदेशबारेमा सहमति भएपनि शासकीय स्वरुपको बारेमा कुरा मिलेन ।

उपेन्द्र यादवको फोरम नेपाल राष्ट्रपतीय प्रणालीकै अडानमा रहे भने सद्भावना पार्टी र तमलोपा प्रधानमन्त्रीय प्रणालीमा अडिग रहे । यसलाई अर्को बैठकबाट टुगों लगाउने कुरा भएको छ । यसबाहेक अरु थुप्रै कुराहरु त्यहाँ भएका छन् यहाँ उल्लेख गरियो भने हल्ली खल्ली हुन्छ । जनताले सुचना कति पचाउँछन कति पचाउन सक्दैनन् त्यो कुराको ज्ञात पत्रकारलाई अवश्य हुन्छ । नेताजीहरु चिन्ता नलिनुस् । यदि तपाईहरु इमान्दारीपूर्वक एकीकरणमा लाग्नु भएको छ भने यस्ता झिना मसिना सामाचारबाट नतिर्सिनुस् । पत्रकारलाई आफ्नो काम गर्न दिनुस् तपाई आफ्नो काम गर्नुस् भन्न खोजिएको यति हो ।