मोदीसँग यी कुरा गर्छन् मधेशी नेता

भारतीय प्रधानमन्त्री नरेन्द्र मोदीसँग भेटमा मधेशवादी दलका नेताहरु के कस्तो कुरा गर्ने भनि तयारी साथ मधेशी नेताहरु आज मोदीलाई भेट्दैछ ।  २.४५ वजेदेखि ३.३० बजेसम्म ह्यातमा भेटन लागेक मधेशी नेताहरुले विकास निर्माणका साथै सविधान निर्माणमा विशेष जोड दिने भएका छन् । प्रधानमन्त्री नरेन्द्र मादीसँग सामूहिक भेटको क्रममा के के एजेण्डामा छलफल गर्ने विषयमा उनीहरु आपसमा छलफल गरिसकेका छन् ।

शनिवार मधेशी पत्रकार संघको संयोजनमा भएको कार्यक्रममा पनि मधेशी नेताहरुले मोदीसँग भेटमा के के विषयमा कुरा राख्ने सम्बन्धमा निकै गहन छलफल गरेको छ । आइतवार पनि उनीहरु आपसमा बसेर एजेण्डा तय गरेको छ । संघीयतासहितको सविधान निर्माणमा सहयोग गर्न भारतलाई आग्रह गर्ने तय गरेका छन् । अहिलेको मुख्य एजेण्डा भनेको शान्ति र सविधान हो त्यसपछि मात्र विकास भएकाले राजनीतिक समास्या समाधान गर्नका लागि भारतको सहयोग आवश्यक रहेको निष्कर्ष निकालेको छ । साथै उनीहरुले विकासको क्षेत्रमा हुलाकी सडकलाई प्राथमिकतामा राख्न पनि आग्रह गरिने भएको छ ।
विकासको मेरुदण्ड भनेको मधेशको हुलाकी सडक नै हो, र भारतले तीन वर्षभित्र त्यसलाई पुरा गर्नुपर्ने सुझाव आफूहरुले दिने तराई मधेश सद्भावना पार्टीका अध्यक्ष महेन्द्र राय यादवले बताए । हुलाकी सडक निर्माण मधेशीको मात्र होइन भारतको प्रतिष्ठासँग जोडिएको विषय पनि रहेको बताउँदै हुलाकी सडक निर्माणमा विशेष जोड दिन आग्रह गर्ने एजेण्डा तय गरेको छ । रेल सेवा पनि हुलाकी सडकभन्दा उत्तर र महेन्द्र राजमार्गभन्दा दक्षिण नै हुनुपर्ने ध्यानाकर्षण प्रधानमन्त्री नरेन्द्र मोदीलाई गराउने सद्भावना पार्टीका अध्यक्ष राजेन्द्र महतोले बताए ।
मधेशी जनअधिकार फोरम लोकतान्त्रिकका अध्यक्ष विजयकुमार गच्छदारले अहिलेको मुख्य एजेण्डा भनेका सविधान निर्माण हो, र यसमा भारतको सहयोग आवश्य रहेको बताउँदै मोदीसँग भेटमा आफूहरले संघीयतासहितको सविधान निर्माण गर्नमा सहयोग गर्न आग्रह गर्ने बताए । विगतको भन्दा नेपाललाई हेर्ने दृष्टिमा भारतले फरक देखाएको बताउँदै उहाँले मोदी सरकारले नेपालसँग राजनीतिक सम्बन्ध बढाउन चाहेको धारणा राख्नुभयो । केही दिन पहिले भारतीय विदेश मन्त्री सुष्मा स्वराजको भेटमा मधेशलाई काठमाडौको दृष्टिले होइन मधेशलाई मधेशकै दृष्टिले हेर्ने कुरा सुष्माले प्रतिवद्धता जनाएको बताए । उनले मोदीसँगको भेटमा पनि नेपालको विकासमा मधेशलाई प्राथमिकतामा राख्न ध्यानाकर्षण गराउने बताए ।
राष्ट्रिय मधेश समाजवादी पार्टीका अध्यक्ष शरत्सिह भण्डारीले मधेशको मुख्य समस्या भनेको चुरे समस्या हो र भारतलाई यसप्रति ध्यानाकर्षण गराउने बताए । चुरलाई हरित क्रान्तिसँग जोडेर विकास गर्ने र यसले भारतलाई समेत फाइदा पुग्ने कुरा प्रधानमन्त्री मोदीलाई विश्वस्त बनाउनुपर्ने बताउँदै उनले चुरे समस्यामा ध्यान दिए भने बाढी र पहिरो तथा खडेरीबाट भारतको विहार र उत्तर प्रदेश तथा नेपालको मधेश मुक्त हुने धारणा राखे । उनले तराई पर्यटनमा पनि भारतको सहयोग आवश्यक रहेको बताए । जनकपुरलाई अयोध्यासँग, लुम्बनीलाई सारनाथ, पशुपतीलाइ काशीनाथ, बराहक्षेत्रलाई सोपुरसँग जोडेर तराईको पर्यटनलाई विकास गर्न सकिने बताउँदै उनले यस विषयमा पनि प्रधानमन्त्री नरेन्द्र मोदीलाई मधेशवादी दलले ध्यानाकर्षण गराउने बताए ।
तराई मधेश लोकतान्त्रिक पार्टीका अध्यक्ष महन्थ ठाकुरले भारतीय प्रधानमन्त्री नरेन्द्र मोदीको प्राथमिकतामा नेपाल भए जस्तै मधेशलाई पनि सोही स्थानमा राख्नुपर्ने बताए । मधेशको विकास भए मात्र नेपालको विकास सम्भव हुने भन्दै उनले मधेशको विकासको मेरुदण्ड हुलाकी सडक निर्माणलाई प्राथमिकतामा राख्नुपर्ने बताए ।
मधेशी जनअधिकार फोरम गणतान्त्रिकका अध्यक्ष राजकिशोर यादवले मधेशलाई वेवास्ता गरेर संघीयतासहितको सविधान निर्माण हुन सक्दैन भने कुराको ज्ञात प्रधानमन्त्री मोदीलाई गराउने पर्ने धारणा राखे । दुई तिहाईको बलमा सविधान निर्माण गर्ने कुरा भइरहेको छ, यदि त्यस्तो भयो भने पुनः सविधान बन्दैन र देशमा विद्राह हुन्छ उनले भने, सहमतिको आधारमा सविधान निर्माण हुनुपर्छ र यसमा भारतको भूमिका अनिवार्य छ ।’
मधेशीको लागि अहिले सीमा सुरक्षा टाउको दुखाईको विषय बनेको बताउँदै उनले मधेशी जनता दुईतिरको चेपुवामा परेको र भारतको सुरक्षाकर्मीबाट मधेशी जनता प्रताडित भएको छ नै नेपाली सुरक्षाकर्मीबाट त्यति नै प्रताडित भएको बताए । नेपाल भारतको सीमा सुरक्षालाई व्यवस्थित गर्न पनि भारतलाई ध्यानाकर्षण गराउनुपर्ने बताए । नेपाल र भारतबीचको सम्बन्ध मधेशीले गर्दा भएको हो, मधेशी नभएको भए यस्तो सम्बन्ध हुने थिएन, उनले भने, मधेशी जनताको भारतसँग विशेष सम्बन्ध भएकाले मधेशको विकास विना समग्र नेपालको विकास असम्भव रहेको बताए ।
संघीय सद्भावना पार्टीका अध्यक्ष अनिल झाले अहिलेको अवस्थामा भारतलाई सविधान निर्माणमा सहयोग गर्न आग्रह गर्नुपर्ने बताए । सविधान निर्माण नभएसम्म देशमा शान्ति प्रकृया पुरा हुँदैन, शान्ति प्रकृया पुरा नभएसम्म देशमा विकास नहुने भएकाले पहिला सविधान निर्माणमा जोड दिनुपर्ने उनले धारणा राखे ।
कार्यक्रममा मोदीको भ्रमणलाई कसरी फलदायी बनाउने विषयमा मधेशका बुद्धिजिवी सीके लाल, तुलानारायण साह, दिपेन्द्र झा, सुरेन्द्र महतो र पत्रकार रामकुमार कामत, वकिलहरुले पनि मधेशी नेताहरुलाई सुझाव दिएका थिए ।